Түмний олон хүүхдийн оюуны гэрэлт замыг гийгүүлж, хүсэл мөрөөдлийн галт тэргэнд зөв хүрэх чигийг олгож байсан ховорхон агаад эрхэм багш бол Биньеэгийн Цолмонхүү. Увсын хүүхдүүд хаа нэгтээ түрүүлж, манлайлж яваа бол тэдний ард Цолмонхүү багшийн нэр хамт явдаг .
Цолмонхүү багш маань 1966 онд МУ-ын гавьяат багш Биньеэгийн ууган хүү болон мэндэлжээ. Түүнийг Биньеэгийн Цолмонхүү гэхээсээ Увсын Цолмонхүү хэмээн МУ-ын боловсролын салбарт дуу нэгтээ бахархан нэрлэж байсан бөгөөд одоо ч түүний гавьяа үргэлжилсээр.
Алтан гадас одонт, Ардын боловсролын Тэргүүний ажилтан, МУ-ын аварга багш, МУ-ын зөвлөх Биньеэгийн Цолмонхүү багшийн гараас шилдэг сэхээтэн, эрдэмтэд, математикч, зохион бүтээгч, инженерүүд төрөн гарсан юм.
Б.Цолмонхүү багш Улсын Мэдээлэл зүйн олимпиадын 8 алт, 6 мөнгө, 4 хүрэл медальт, Аймгийн Мэдээлэл зүйн олимпиадын 18 удаагийн аварга Боловсролын салбарын дархан аварга багш юм. Аймгийн Математикийн олимпиадаас шавь нар нь 20 алт, 13 мөнгө, 17 хүрэл медаль ,Улсын олимпиадаас 1 хүрэл, 2 дөрөвдүгээр байр ээзэлж байсан бол
Аймгийн Мэдээлэл зүйн олимпиадад шавь нараас нь 13 алт, 5 мөнгө, 11 хүрэл медаль Улсын Мэдээлэл зүйн олимпиадаас шавь нар нь 1 алт, 2 мөнгө, 4 хүрэл медаль хүртсэн нь улсын хэмжээний төрөлжсөн олимпиадаас хамгийн өндөр үзүүлэлт тогтоосон амжилт болсон юм. Аливаад нухацтай, холыг хардаг, өөрийгөө байнга хөгжүүлж сорьж байдаг, тэсвэр хатуужилтай тууштай зан чанар нь Цолмонхүү багшийг мөнхөд дурсах амжилтад хүргэсэн гэлтэй.
Түүнчлэн спортын олон төрөлд хүч сорьж явсан агаад сагсан бөмбөгийн спортын дэд мастер, хөнгөн атлетикийн 1-р зэргийн тамирчин, үндэсний шагай харвааны аймгийн гоц мэргэн, шатар, даам, гар бөмбөг, ширээний теннисний системийн аварга багш гээд түүний амжилтыг тоочоод барамгүй.
Боловсролын байгууллагад тасралтгүй 26 жил ажиллахдаа сургалтын арга зүйг боловсронгуй болгох, шинийг эрэлхийлэх, сургалтын таатай орчин бүрдүүлэн хамт олноо чадварлаг удирдан зохион байгуулж байв. Залуу багш нараа байнга дэмжин ажиллаж зааж зөвлөн алсыг харсан онч бодлоготой сэхээтэн байлаа.
Эрхэм багшийн гэрэлт үйлсийг мөнхөлж Увс аймагт “Мэдээлэл зүйн улсын олимпиадыг Б.Цолмонхүү багшийн нэрэмжит хэмээн уламжлал болгон зохион байгуулж байна.
Сэтгэгдэл үлдээх