Бид энэ удаагийн нийтлээрээрээ Япон улсаас мэргэжлийн бүжигчдийнхээ хамтаар хүрэлцэн ирсэн УВС нутгийн унаган хүү балетын жүжигчин Аргайсүхийн ХАНГАЙТАЙ уулзсан тэмдэглэлээ хуваалцаж байна.
А.Хангай нь балетын урлагт 32 дахь жилдээ зүтгэж буй жүжигчин, найруулагч бөгөөд төрөлх нутгийнхаа түүхт ойн жилд, шинэ Ойрад театрын тайзнаа “Щелкунчик буюу Цөмөөхэй” бүжгэн жүжгийг амилуулахаар жилийн өмнөөс төлөвлөж, 7 хоногийн өмнө Улаангом хотод хүрэлцэн ирж тоглолтын бэлтгэл ажилдаа бүх анхаарлаа төвлөрүүлээд байна.
Тэрээр Монголын дуурь бүжгийн театраас ажлын гараагаа эхэлж, Япон, Америк, Герман зэрэг Улсад уран бүтээл туурвиж явсан бөгөөд сүүлийн 15 жил Япон улсад ажиллаж амьдран балетын олон зуун шавь нарыг бэлтгэсээр байгаа эрхэм багш билээ.
Түүний хувьд Увс нутгаа зорин ирсэн гол шалтгаан нь зөвхөн тайзны уран бүтээл бус, сонгодог урлагийг төрсөн нутагтаа амьлуулахад мэдлэгээ хуваалцах, түгээн дэлгэрүүлэх соёл урлагийн жинтэй үйл явдал юм
Энэ амралтын өдрүүдэд буюу 2025 оны 12 сарын 06,07-нд шинэ ОЙРАД театрын тайзнаа тоглогдох Шелкунчик бүжгэн жүжгийг найруулахаар 11 сарын 25-ны өдөр УЛААНГОМ хотод ирсэн түүний хувьд энэ удаагийн бүтээл урьд урьдынхаас илүү өргөн хүрээг хамарч
- Японы Элчин сайдын яам
- Увс аймгийн ЗДТГ
- Баруун таван аймгийн бүжигчид
- Японоос ирсэн уран бүтээлчид гэх мэт Улс хоорондын болон бүс нутгийн хамтын ажиллагааг агуулж байгаагаараа ихээхэн онцлогтой болж байгаа аж.
Мөн Увс аймгийн 100 жилийн ойн хүрээнд манай аймгийн ЗДТГ, Япон Улсын ЭСЯ-ны хамтын ажиллгааны хүрээнд гоцлол бүжигчин Б.БАТ-ЭРДЭНЭ Япон улсад очиж сонгодог урлаг балетийн чиглэлээр бэлтгэл хийсэн нь тоглолтын түвшинг ахиулсан томоохон давуу тал гэж тэр үзэж байна.
![]()
Бүжигчин Б.БАТ-ЭРДЭНЭ ![]()
Бүжигчин БАТ-ЭРДЭНЭ ЯПОН УЛСАД
А.Хангай: “Щелунчик буюу Цөмөөхэй”-г зөвхөн урлагийн бүтээл бус, залуу үеийг соён гэгээрүүлэх нэгэн том боломж гэж хардаг.
Энэ удаагийн тоглолтод 40 орчим хүүхэд залуучууд оролцож байгаа нь тэдэнд урлагийн боловсрол олгох, цаашдын амьдралдаа дурсамжтай, үнэ цэнтэй туршлага үлдээх боломж бөгөөд
Эдгээр хүүхдүүд бүгд мэргэжлийн бүжигчин болохгүй ч, өнөөдрийн тайзан дээрх мэдрэмж нь тэдний амьдралын хамгийн нандин дурсамжуудын нэг болно хэмээн тэр нүүр дүүрэн инээмсэглэх нь үнэхээр хийж байгаа ажилдаа хичнээн дуртайг илтгэнэ.
Мөн Улаанбаатарт төвлөрсөн сонгодог урлагийг хөдөөд хүргэх нь А.Хангайн хувьд олон жилийн мөрөөдөл байжээ. Гэтэл орон нутгуудаас анхлан түүний төрсөн нутагт сонгодог бүжгэн жүжиг тоглогдож байгааг сонсоод юу юунаас илүү догдлон баярлаж байснаа хэлж хэзээ нэгэн цагт өөрийн хувь нэмэрээ оруулна аа хэмээн төсөөлж явсан нь өнөөдөр биеллээ олж байгаад туйлын баяртай байна.
А.Хангай: “Соёлын хэрэгцээ гэдэг зүйл аймаг сум болгонд байх ёстой. Сонгодог урлагт хүүхэд багачууд ойртож байгааг харахад үнэхээр сайхан.”
Түүнийхээр бол Гэр бүлийн гайхамшигт шинэ жилийн дурсамжийг дэлхийн өнцөг булан бүрт түгээдэг “Щелкунчик буюу Цөмөөхэй”-н орон нутагт тоглогдож байгаа нь:
- хүүхдүүдэд урам зориг өгч,
- урлагийн мөрөөдлийг асааж,
- тэгш хүртээмжийг бий болгож,
- орон нутгийн соёлыг шинэ төрөл зүйлээр амь оруулж байгаа чухал алхам гэж хэлэв.
Тэрээр тус бүтээлд дэмжлэг үзүүлсэн Увс аймгийн Засаг даргын Тамгын газар, Засаг даргын орлогч Э.Баатарсан, Ойрад театрын дарга Б.Лхагвасүрэн, Ойрад театрын уран бүтээлчид, GT баллетын багш болон хүүхдүүд, Онош эмнэлэгийн захирал Ц.Батболд, эмч С.Пүрэвсүрэн, Д.Түвшинтөр захиралтай MOON LIGHT зочид буудлын хамт олон зэрэг бүх хүмүүст хүндэтгэлтэйгээр талархал илэрхийлсэн бөгөөд бүжгэн жүжиг нь орон нутагт соёлын тэгш хүртээмжийг бий болгох зорилгоор амжилттай хэрэгжихэд дэмжигчид, хамтран ажиллагчидгүйгээр бүтэх боломжгүй байсан гэдгийг А.Хангай найруулагч ярианы төгсгөлд онцлон хэлэв.
Эрхэм уншигч Увсчууд та бүхнийг 12 сарын 06-ны өдрийн 17:00 цагаас болон 07 -ны өдрийн 13:00, 17:00 цагуудад ОЙРАД ТЕАТРТ гэр бүлийн хамтаар зочлон шинэ жилийн гайхамшигт дурсамжаа бүтээхийг урьж байна.
Сэтгэгдэл үлдээх