Улаангом хотын төв цэгт, олон жилийн түүх, дурсамжийг агуулах “Хархираа” зочид буудлын буурин дээр орчин үеийн архитектурын шийдэл, олон улсын барилгын стандартыг бүрэн хангасан “Ariya Tower” тансаг зэрэглэлийн орон сууц сүндэрлэн босож байна.
Хажуугаар зорьсон хүн бүрт өндөр хүлээлт үүсгээд буй “Ariya Tower” төслийн талаар, бүтээн байгуулж буй “МОНКОМОС” ХХК-ийн Гүйцэтгэх захирал Я.Булгантай хийсэн ярилцлагыг хуваалцъя.
Сэтгүүлч: Юуны өмнө танд болоод танай баг хамт олонд аймаг, орон нутгийнхаа хөгжил цэцэглэлтэд өнгө нэмэх сайхан барилга байгууламжийг босгож байгаад талархал илэрхийлье. Энэхүү түүхэн байршилд сүндэрлэн буй төслийнхөө талаар манай уншигчдад танилцуулаач.
Сайхан үгээр бидний ажлыг үнэлэж байгаа танд баярлалаа. Бид гоё газар гэж зөвхөн байршлыг хэлэхээс илүүтэй, энерги, орчин, дэд бүтэц, мэдрэмж, хүлээн зөвшөөрөгдөх гээд бүх зүйлийг нэгтгэн харсан. Тэгээд энэхүү түүхэн энергитэй газар дээрээ сайхан барилга босгохыг зорин ажиллаж байна.
Я.Булган: Газар ба барилга хоёр төгс хосолж чадвал илүү их үнэ цэнэтэй гэж би боддог.
“Ariya Tower” нь тансаг зэрэглэлийн орон сууц учраас оршин суугчдын аюулгүй байдал, эрүүл ахуй, тав тухтай амьдрах орчин гээд бүх шаардлагыг хангах нь нь бидний зорилт юм. Жнь манайх бүтээн байгуулалтынхаа 3-9 давхарт багадаа 49 айлын орон сууц төлөвлөгдөх боломжтой талбайд 35 айлын орон сууцыг төлөвлөөд ихэнх захиалгуудаа аваад явж байгаа. Харин 1, 2 давхартаа Увсчууддаа шинэ өнгө төрх, мэдрэмжийг түгээх орчинтой төрөл бүрийн үйлчилгээний төвүүдийг бий болгохоор зорьж байна. Мэдээж архитекторын онцлог дизайнтай барилгын ажлын явцад олон бэрхшээл, шийдэх нарийн асуудлууд гарна. Тэр бүрийг манай багийхан яг л өөрсдийн амьдрах байр гэдэг талаас нь хандаж, өөриймсөг, хариуцлагатайгаар бүтээж байгаа.
Сэтгүүлч: Яагаад “Ariya Tower“ гэдэг нэр өгсөн бэ? Бас бүтээн байгуулалтынхаа үнэ цэнийг юу гэж харж байна?
Надад нэг хүн энэ сайхан энергитэй газрыг чи л амь оруулж гоё зүйл барьж чадна гэж урам зориг, эрч хүч хайрлаж байв. Тэр цагаас эхлэн сайхан барилга барих юмсан гэж бодох болсон. Одоо харахад “Чи чадна” гэж урам өгсөн тэр хүнд маш их талархаж байна.
“ARIYA” гэдэг нэрийг сонгохдоо их удаан бодож ярилцсан. Зөөлөн дуулдаж, хүний сэтгэлд эерэг, гэрэлтэй мэдрэмж төрүүлдэг энэ үг өөрөө нэгэн төрлийн сайхан энерги агуулдаг юм шиг санагддаг. Бас монголчууд бид хүний таван буян гэж ярьдаг шүү дээ. Арьяа гэдэг нэрэнд энэ бүх буян шингэсэн, хүн бүрийн хүсэж, мөрөөддөг сайхан амьдралын утга оршдог юм билээ.
Тэгээд л “ARIYA” TOWER гэдэг нэрийг өгч, байранд орсон айл бүрд энэ таван буян шингэж, аз жаргалтай, эрүүл энх өнөр өтгөн амьдран суугаасай гэсэн утгыг давхар билэгдсэн.
Мөн энэ барилга маань баригдах байршил бол минийхээр Улаангом хотын хамгийн үнэ цэнтэй, хамгийн зөв энергитэй газар. Хотын зүрх нь гэж хэлж болохоор ийм онцгой газарт утга агуулгатай, чанартай, хотын өнгийг тодорхойлох тансаг барилга сүндэрлэж байвал зөв биз. Бас байршил нь өөрөө үнэ цэнийг бүтээдэг болохоор ARIYA TOWER ч мөн түүндээ тохирсон байхаар төлөвлөгдсөн.
Тэгэхээр хүн бүр өөрийн хийж бүтээсэн зүйлтэй, амьдралаа бий болгосон хөдөлмөртэй, хэлэх үгтэй, бахархах түүхтэй. Бас гэр бүлтэйгээ тайван, тав тухтай, аюулгүй, үнэ цэнтэй орчинд амьдрах ёстой. ARIYA TOWER бол яг л ийм орон зай.
Товчхондоо бол бид энэ төслийг нэг барилга барих төдий зүйл гэж хараагүй. Харин амьдралын таван буян бүрдсэн, зөв энерги бүхий, аз жаргалын гэр болсон орон зай бий болгохыг хүссэн юм.
Сэтгүүлч: Энэ үнэ цэнэтэй төслийг амжилттай хэрэгжүүлэхэд хамгийн их хувь нэмэр оруулж байгаа хүмүүсээсээ та дурдвал?
Х.Тэсхүү гээд намайг байнга дэмжиж, сонсож байдаг миний хань байна. Ер нь хүнийг маш сайн сонсож байхад хүн цэцэглэж байдаг гэж би боддог. Хань минь ямар их хүлээцтэй, хүндлэлтэй байдгийг одоо хүртэл би биширдэг. Би их азтай хүн шүү. Миний хань бүх зүйлд надаас илүү нарийн хандаж холыг бодож ирээдүйг хардаг. Их сайхан харилцаатай. Хүн бүрд л “төрсөн” ахын мэдрэмжийг өгдөг. Хүн бүртэй ахын дүү юу байна, яаж байна гээл түрүүлээд л асууна даа. Энэ төсөлд бараг л миний хэлсэн санаа, шийдэл, асуудлыг хамгийн түрүүн шийдэж дэмжиж “зөв” болгож улам сайжруулдаг.
Мөн миний том хүү энэ төслийн ерөнхий инженер Т.ЛХАГВА байна. Сая түүхт ойн өмнө сүндэрлэн босож Увс нутгийнхаа 100 жилээр өнгө нэмсэн “Хархираа” цогцолборыг бүтээн босгоход эхнээс нь гар бие оролцсон барилгын инженер мэргэжилтэй. Мөн хяналтын инженерээр МУ-ын мэргэшсэн инженер ах Х.Чимэдбаатар, инженер Д. Сүхбат, Ц.Батжаргал захиралтай Лайт пик таур ХХК гээд “ARIYA TOWER” төслийн гол хөдөлгөгч хүч болсон мэргэжлийн шилдэг хүмүүсээс бүрдсэн төслийн багийн бүгдээрээ л байна. Бүгд л маш том үүрэг хариуцлагыг нуруундаа үүрч хариуцлагатай ажиллаж байгаа.
Сэтгүүлч: Тэгэхээр танай гэр бүл энэхүү төслөө бүтээн босгоход бүгдээрээ оролцож байгаа гэж ойлголоо? Үүнээс та юуг илүүтэй мэдэрч байна?
Яг тийм.Урьд нь аав нь өглөө эрт босоод явахад хоёр хүү унтаж байдаг бол одоо аав унтаж байхад хоёр хүү минь аль эрт босоод ажилдаа гарчихсан байдаг болж. Бараг л шөнө унтаж чадахгүй ажилдаа санааширч сэрж байна. Бүх зүйлд сэтгэлээ шингээж бүтээхийг зорьж, тэр их ажлын амтанд өөрийн эрхгүй орчихсон яваад баярлаж сууна. Шууд нүүрэн дээр нь сайн байна гээд магтаад байхгүй ч сэтгэл дотроо бол ажил хөдөлмөрийн амтыг мэдэрч байгаа хөвгүүддээ, эцэг хүний ноён нуруу, холч ухаанаар хөвгүүдээ зөв хүмүүжүүлж чадсан ханиараа маш их бахархаж байна. Манай гэр бүлийнхэн бүгд л энэ төсөл дээр гар бие оролцож байна.
Сэтгүүлч: Бидэнд энэ сайхан бүтээн байгуулалтынхаа талаар мэдээлэл өгсөнд баярлалаа. Ярианыхаа төгсгөлд та ашиглалтад орохыг догдлон хүлээж байгаа хүмүүстээ хандаад сэтгэлийн үгээ хуваалцаач?
Анх 2025 оны 4-р сард төслөө эхлүүлж байснаас хойш өнөөдөр / 2025.11.30 / гаднах ажил дуусах тун дөхөж байна. Ажлууд яг л графикын дагуу явагдаж байгаа болохоор 2026 оны 2-р улиралд бүрэн ашиглалтад төлөвлөгөөтэй байгаа. Эцэст нь энэхүү төсөл бол зүгээр нэг барилга биш гэр бүл, хамт олон, орон нутгийн иргэд, ирээдүйд энэ байранд амьдрах хүмүүсийн аз жаргал, тав тух, амьдрах орчныг сайжруулах бүтээл болох учраас бид ч мөн тэр мөчийг догдлон хүлээж байгаа. Та бүхэнд зорьж ирээд төсөлтэй маань танилцсанд маш их баярлалаа. Тун удахгүй бүгдээрээ нээлтээ хийгээд баяр дүүрэн уулзацгаая.
Сэтгүүлч Т.Алтанминж
Сэтгэгдэл үлдээх