Увс аймгийн Наранбулаг сумын харъяат, Чөлөөт бөхийн Ази тивийн аварга, ОУХМ, Уран гараа дэвээт, Улсын заан Санжжавын СҮХБААТАР агсны нэрэмжит барилдаан өчигдөр эхэлсэн бөгөөд өнөөдөр хаалтанд зориулсан аймаг, сумын цолтой 64 бөхийн барилдаан явагдаж байна..
Улсын заан С.Сүхбаатар агсан 1959 онд Увс аймгийн Наранбулаг суманд төрсөн, 1987 оны Улсын наадмын гурвын даваанд Улсын начин Д.Сэрээтэр, дөрөвт Даян аварга С.Цэрэн, тавд Улсын арслан П.Дагвасүрэн нарыг давж “Улсын начин” цол хүртсэн, 1990 оны МНТ-ны 750 жилийн ойгоор Улсын арслан Б.Ганбаатараар долоо давж “Улсын заан” цол хүртсэн, 1985, 1989 онуудад дөрөв давсан, Цагдаагийн хүч нийгэмлэгийн аварга шалгаруулах барилдаанаас Цэргийн начин, Цэргийн заан, Цэргийн арслан цолуудыг дараалан авсан, Баруун талтай, тонгорох, бусгах, халз хутгах, дэгээдэж эргүүлэх, давхар ачих мэхүүдийг даамгай хийдэг, Сүрлэг сайхан гараа дэвээтэй бөх байв.
Түүний нэрэмжит энэхүү барилдаан 2007 оноос хойш тасралтгүй зохион байгуулагдаж байгаа бөгөөд анхны жилүүдэд тус барилдааны түрүү үзүүр бөхчүүдэд СУМЫН ЦОЛ олгодог байжээ.
Гэрэл зургийг Данзангийн Пүрэвжав / 2025.11.23-Увс аймаг, спортын ордон /
Сэтгэгдэл үлдээх