Завхан сум 100 жил – Түмэн тэмээний нутаг, Монгол Улсын анхны адуучин Хөдөлмөрийн баатар төрөн гарсан түүхт Увс аймгийн Завхан сумын 100 жилийн ойн баяр наадам зуны дэлгэр цагт ёслол төгөлдөр эвлэг сайхан болж өндөрлөлөө. Зуун жилийн түүхт ойн баяр наадмын хурдан хязаалангийн уралдаанд газар газрын шандаст 60 гаруй хүлэг тоосоо өргөж, хурд хүчээ сорив.
Увс, Завхан, Ховд, Говь-Алтай зэрэг зэргэлдээх аймгуудын хурд чуулсан энэхүү уралдаанд Ховд аймгийн Мөст сумын хүлэг түрүү магнайд хурдалж, наадамчин олныг баясгалаа.
Хязаалан насны айраг, түрүүний цуваа:
-
Түрүү магнай: Ховд аймгийн Мөст сумын харьяат аймгийн алдарт уяач Паламын Ган-Эрдэнийн Хонгор хязаалан зуун жилийн ойг зорин ирж тод магнайдаа тоосгүй хурдалж, түрүү хүртэв.
-
Аман хүзүү: Увс аймгийн Завхан сумын харьяат, уяач Доржбаярын Гантөмөрийн хээр хязаалан.
-
Айргийн гурав: Увс аймгийн Завхан сумын харьяат, уяач Батжаргалын Ариунболдын бор хязаалан.
-
Айргийн дөрөв: Завхан аймгийн Дөрвөлжин сумын харьяат, Аймгийн алдарт уяач Болормаагийн Дагвасүрэнгийн хул хязаалан.
-
Айргийн тав: Увс аймгийн Завхан сумын харьяат, уяач Баярмагнайн Бат-Очирын хээр хязаалан тус тус хурдалж, торгон жолоогоо өргүүллээ.
Түүхт 100 жилийн ойдоо амжилттай наадсан нийт уяачид болон унаач хүүхдүүдэд халуун баяр хүргэж, хүлэг бүрийнх нь босоо цагаан хийморь ивээх болтугай.
Сэтгэгдэл үлдээх