1945 оны чөлөөлөх дайнд хариуцсан салаагаа зөв зохион байгуулж, чадамгай удирдан эх орныхоо эрх чөлөө тусгаар тогтнолын төлөө эрэлхгээр тэмцэж явсан баатруудын нэг бол Түүвэйн Дүүдэй юм.
1945 оны 8-р сарын 19-21-нд Жанчхүүд болсон тулалдаанд түүний удирдсан салаа гарамгай байлдсан учир байлдагч Л.Аюуш, Д.Данзанваанчиг, С.Дампил нар “Улсын баатар” цолоор шагнагдсан байна.
Монгол улсын баатар Түүвэйн Дүүдэй 1921 онд Увс аймгийн Зүүнговь суманд төржээ. Улсад 42 жил ажилласнаас 26 жил нь ардын армид алба хаасан байдаг.1940-1943 онд Матадын 8 дугаар дивиз, Сайншандын мотомеханикжуулсан 7 дугаар хуягт бригадад байлдагч,1943-1953 онд 7 дугаар хуягт бригадад салаа, ротын даргаар тус тус ажиллаж байжээ.1960 онд Улаанбаатар хотод 52 айлын орон сууцыг барих ажлыг удирдаж, барилгын анхны Социалист хөдөлмөрийн бригадыг байгуулан үр бүтээлтэй ажиллаж байжээ.
Барилгын хэрэг эрхлэх газрын харьяа ангийн даргаар ажиллаж байхдаа Увс аймгийн Улаангом дахь гурилын үйлдвэрийн барилга барих ажлыг удирдаж 1958 онд ашиглалтад оруулж байсан түүхтэй.
Тэрээр 1951 онд АИХ-ын депутатаар сонгогдож, байлдааны гавьяа, ЗХУ-ын Алдрын одон, Улаан тугийн одонгоор шагнагдаж БНМАУ-ын АИХ-ын Тэргүүлэгчдийн 1985 оны зарлигаар “Монгол Улсын баатар” цол хүртжээ.
БНМАУ-ын баатар Түүвэйн Дүүдэй Увс аймгаас төрсөн гурван баатрын нэг бөгөөд 2005 онд нутгийн ард иргэдийн санаачилгаар эрхэм баатрын хөшөө дурсгалыг Увс аймгийн Зүүнговь суманд босгосон байна.
Сэтгэгдэл үлдээх