Увс аймгийн Боловсролын газраас боловсролын сургалтын байгууллагуудын удирдах ажилтнуудын 2026 оны анхны сургалт-зөвлөгөөнийг Улаанбаатар хотод зохион байгуулж байна.
Тус сургалт-зөвлөгөөнд аймгийн хэмжээнд үйл ажиллагаа явуулж буй хүүхдийн цэцэрлэг, ерөнхий боловсролын сургуулийн 60 гаруй удирдах ажилтан оролцож, боловсролын салбарын бодлого, шинэчлэл, цаашдын чиг хандлагын талаар мэдээлэл, туршлага солилцож байна.
Монгол Улсын Засгийн газраас 2026 оныг “Боловсролыг дэмжих жил” болгон зарласантай уялдуулан боловсролын чанарыг ахиулах, хөтөлбөрийн шинэчлэлийг эрчимжүүлэх, багшийн мэргэжлийн хөгжил, боловсролын хүртээмжийг нэмэгдүүлэх, дэд бүтэц, сургалтын орчин, хэрэглэгдэхүүнийг сайжруулахад голлон анхаарч ажиллах зорилтыг дэвшүүлж байна.
Мөн боловсролын чанарт нөлөөлж буй багшийн дутагдал, ажлын ачаалал, бүлэг дүүргэлт, сургалтын тоног төхөөрөмж, цахим хэрэглэгдэхүүний хүрэлцээ зэрэг асуудлуудыг онцолж, тэгш, хүртээмжтэй, чанартай боловсролын үйлчилгээг бий болгох, мэдлэг чадвартай хүний нөөцийг бэлтгэх, багш нарыг чадавхжуулах, боловсролын салбарын цахим шилжилтийг эрчимжүүлэхэд удирдах ажилтнуудын манлайлал чухал болохыг тэмдэглэлээ.
Энэхүү сургалт-зөвлөгөөн нь аймгийн боловсролын байгууллагуудын удирдлагын чадавхыг бэхжүүлэх, бодлогын хэрэгжилтийг хангах, салбарын хөгжилд бодитой ахиц гаргахад чиглэж байна.
Сэтгэгдэл үлдээх