Увс аймгийн Түргэн сум нь 1925 онд Баянчандмань уулын Төгсбуянтын хошууны Дэлгэрмөрөний дэнж дээр Баянхайрхан сум нэртэйгээр байгуулагдаж байсан бөгөөд 1931 онд ТҮРГЭН сум болон өөрчлөгдсөн түүхтэй.
Түргэн сум нь 3 багтай 1150 хүн амтай, 154 мянган толгой малтай. Голлох аж ахуй нь газар тариалан, мал аж ахуй юм. Тус суманд дөрвөд ястан голлон амьдардаг.
Сумын газар нутаг нь мөнх цаст өндөрлөг уулс, хээр тал, нам дор газар зэрэг байгалийн өвөрмөц тогтоцтой бөгөөд Хархираа, Түргэний уулс, их нууруудын хотгорыг дамжсан өргөн уудам нутагтАчит, Үүрэг, Увс нуурын ай савын дунд оршдог.
Увс аймгийн ТҮРГЭНИЙ УУЛСЫН хамгийн өндөр оргил болох “ДЭГЛИЙ ЦАГААН” уул байдаг.
Буга, согоо, бор гөрөөс, аргаль, янгир, чоно, үнэг, ирвэс, шилүүс, хярс, мануул, хадны суусар, тарвага, зурам, эрээн жирх, хэрэм, туулай, чандага, дорго, үмхий хүрэн, нохой зээх, гахай зэрэг ан амьтан, хун, галуу, тогоруу, хойлог, нугас, тоншуул, ятуу, гахууна, тас, бүргэд, ууль, шар шувуу, ёл, сар, харцага зэрэг жигүүртэн шувуудтай.
Хөдөлмөрийн баатар Ц.Буниа, Г.Тэгшжав, С.Эрдэнэ, Ц.Ганчимэг, Төрийн соёрхолт Ж.Гээзэн, төр нийгмийн ахмад зүтгэлтэн, хуулийн ухааны доктор, дэслэгч генерал Р.Гүнсэн, хошууч генерал Ц.Нансалжав зэрэг олон арван алдартан цуутан, оюун ухааны суу билэгтний өлгий нутаг.
Сэтгэгдэл үлдээх