Жачины Янжив ард иргэдийн аж байдлыг дээшлүүлэх, нийгмийн асуудлыг шийдвэрлэх, нэгдлийг санхүү, аж ахуйн хувьд бэхжүүлэх, сум орон нутгаа цэцэглүүлэн хөгжүүлэх үйл хэрэгт өөрийн бүхий л авьяас чадвар, хүч хөдөлмөрөө дайчлан ажилласан жинхэнэ удирдагч хүн юм.
Жачины Янжив 1930 онд Увс аймгийн Тариалан суманд төрж бага, залуу насандаа мал маллаж байгаад 1949-1952 онд Хилийн цэргийн хугацаат алба хааж бичиг үсэгт шамдан суралцсан байна.Цэргийн албанаас халагдаж ирээд төрөлх сумандаа АДХ-ын Гүйцэтгэх захиргааны нарийн бичгийн дарга, орлогч даргаар ажиллаж байгаад 1977 оноос Тариалан, Түргэн, Сагил сумдад сум нэгдэл, намын үүрийн нарийн бичгийн дарга,Тэсийн ТАА-д намын дарга, 1979 онд Сэлэнгэ аймагт сумын ҮЭ-ийн зөвлөлийн дарга, Завхан аймгийн ХААУГ-т мэргэжилтнээр үр бүтээлтэй ажиллаж байжээ.
Гавьяат Ж.Янжив энгийн усалгаатай газар тариалан хөгжүүлэхэд онцгойлон анхаарч энэ ажилд иргэдийг оролцуулж байсны дүнд Тариалан сумын иргэд одоо ч ардын уламжлалт усалгаатай газар тариалан эрхлэн цаг агаарын ямар ч нөхцөл байдалд арвин ургац авсаар байна. Энэ ч чанраар Тариалан сум эдүгээ эдийн засаг санхүүгийн чадавхи сайтай ажил үйлсээрээ тэргүүний сумдын нэг болоод байна.
Нутгийн олон Янжив даргыг Я дарга хэмээн хүндэтгэн авгайлдаг бөгөөд Янжив даргын үед Тариалан сумаас улс, аймгийн ургацын аваргууд, хошой аваргууд,хөдөлмөрийн сайчууд, тэргүүний хүмүүс, алдар цолтнууд олноор төрөн гарсан нь энэ хүний хичээл зүтгэл, удирдлага зохион байгуулах авьяас чадвартай шууд холбоотой юм.
Тэрээр БНМАУ-ын АИХ-ын Тэргүүлэгчдийн 1983 оны 129 дүгээр зарлигаар “Гавьяат усжуулагч” цол хүртсэн байна.
Сэтгэгдэл үлдээх