Хүн ардын эрүүл мэндийг сахин хамгаалах, эрүүл мэндийн үйлчилгээний чанарыг сайжруулахад өөрийн идэвх чармайлт, хүчин зүтгэл, мэдлэг оюунаа зориулсан эмч бол Халтарын Дэлэг гавьяат.
Дэлэг эмч БНМАУ-ын Ардын Их Хурлын Тэргүүлэгчдийн зарлигаар “Хүний гавьяат эмч” цол, 1976 оны 8 дугаар сарын зарлигаар “Хөдөлмөрийн баатар” цол хүртсэн Монгол Улсын анхны хөдөлмөрийн баатар хүний их эмч юм.
Тэрээр 1930 онд Увс аймгийн Өндөрхангай сумын нутагт төржээ.Оюутан цагаасаа л багш нараа дагаж хэд, хэдэн мэс засалд оролцон туршлагажиж, сайн эмч болох зам нь эхэлсэн түүхтэй.
1957 оноос Увс аймгийн эмнэлэгт мэс заслын анхны тасаг бий болж аймагтаа мэс засал хийх боломж бүрдсэн юм. Энэ л үеэс эхлэн Гавьяат эмчийн Дэлэгийн алтан гар дээр олон хүний эрүүл мэнд, алтан амь аврагдаж байсан юм. Тэрээр МУИС-ийг төгсөж ирээд хөдөө орон нутагт 20 шахам жил ажиллан хүн ардын эрүүл мэндийг хамгаалан 5000 гаруй өвчтөнд мэс засал хийж анагаасан байдаг. Дэлэг эмч зөвхөн мэс заслын өвчтөн үзэж эмчлэхээс гадна нүд чих, хамар хоолой, гэмтэл, эмэгтэйчүүдийн нарийн мэргэжлийн тусламжуудыг үзүүлж, эмчилгээ сувилгааг өөрөө гардан гүйцэтгэдэг байв.
Дэлэг эмч уулын спортоор хичээллэж Хархираа, Түргэний мөнх цаст оргилууд болон Япон улсын ууланд удаа дараа авиралт хийж 1973 онд “Уулын спортын мастер” цол хүртжээ. 1960 онд Увс аймгийн нутаг Цагаан дэглий оргилд авирсан уулчдын ослын үеэр олон хүний амь аварсан тухай нутгийн хүмүүс түүнийг дурсан ярьдаг.
1970 оны дунд үед эрүүлийг хамгаалах салбарт 30 гаруй мянган их, бага эмч, сувилагч, асрагч ажиллаж байсны дундаас хамгийн анх
удаа “Хөдөлмөрийн баатар” цол хүртсэн эмч Халтарын Дэлэг юм.
Тэрээр Ардын Их Хурлын депутатаар 3 удаа сонгогдож, Намын XIV, XVII их хуралд төлөөлөгчөөр сонгогдож байсан бөгөөд Увс аймгийн нэгдсэн эмнэлгийг Монгол Улсын хөдөлмөрийн баатар Халтарын Дэлэгийн нэрэмжит болгон нэрлэсэн байдаг.
Сэтгэгдэл үлдээх