Өнгөрсөн долоо хоногт Увс аймагт спортын төрөл бүрийн тэмцээн, арга хэмжээнүүд идэвхтэй өрнөж, өсвөр үе, насанд хүрэгчдийн тамирчид ур чадвар, авхаалж самбаа, хүч чадлаа сорин өрсөлдлөө.
Цүнхэг Увс волейболын холбооноос жил бүр уламжлал болгон зохион байгуулдаг “Холбооны цом–2026” нээлттэй волейболын аварга шалгаруулах тэмцээн амжилттай болж, нийт 21 багийн 250 гаруй тамирчин оролцсон нь тус тэмцээний цар хүрээг илтгэж байна.
Мөн УВС ЛИГ–2026 сагсан бөмбөгийн лигийн нээлтийн тоглолтууд 2026 оны 1 дүгээр сарын 17-ны өдөр зохион байгуулагдаж, сагсан бөмбөг сонирхогчдын анхаарлыг татсан өрсөлдөөнтэй тоглолтууд боллоо.
Үүнээс гадна Увс аймгийн ЕБ-ын 4 дүгээр сургуулийг 2006 онд С.Одгэрэл багшийн удирдлага дор төгссөн 10в ангийн хамт олон төгсөлтийнхөө 20 жилийн ойг тохиолдуулан багшийнхаа нэрэмжит волейболын тэмцээнийг зохион байгуулж, эрэгтэй 12 багийн 80 гаруй тамирчин оролцож байна.
Зэвсэгт хүчний 325 дугаар ангийн 328 дугаар тусгай салбарын зохион байгуулсан MAS-WRESTLING аймгийн аварга шалгаруулах тэмцээн Увс аймгийн Зүүнговь суманд болж, өсвөр үе болон насанд хүрэгчдийн ангилалд 40 гаруй тамирчин тэсвэр тэвчээр, хүч чадлаа сорин өрсөлдсөн юм.
Мөн “Алтан хүү” клубийн 10 жилийн ойд зориулсан 100 буудалт даамын тэмцээнд Увс аймгийн ЕБС-иудын тамирчид амжилттай оролцож, Эрдмийн эхлэл ЕБС-ийн тамирчин Б.Мөнх-Оргил, 3-р сургуулийн тамирчин Б.Сансармаа нар мөнгөн медаль хүртлээ.
Түүнчлэн Увс аймагт бага боловсролын багш нарын дунд “Багш ажлын байрандаа тасралтгүй хөгжих нь” уриатай хэлэлцүүлэг, спортын наадам 10 дахь жилдээ зохион байгуулагдаж, аймаг, сумын сургуулиудын 14 багийн 250 багш, тамирчид оролцсон нь боловсрол, спортыг хослуулсан онцлог арга хэмжээ байлаа.
Ирэх өдрүүдэд цанын өсвөр үеийн Улсын аварга шалгаруулах тэмцээн 2026 оны 2 дугаар сарын 1–4-ний өдрүүдэд Баруунтуруун суманд зохион байгуулагдахаар бэлтгэл ажил эхлээд байгаа нь өвлийн спортын томоохон үйл явдал болохоор байна.
Сэтгэгдэл үлдээх