ОЙРАД ХӨГЖИМТ ЖҮЖГИЙН ТЕАТРЫН УРАН БҮТЭЭЛЧИД ЭРХ АШГАА ХАМГААЛАХААР АЙМГИЙН ҮЭХ-Д ХАНДЛАА
Ойрад Хөгжимт жүжгийн театрын 2026 оны төсөв 33.2 хувиар танагдсантай холбоотойгоор тус театрын уран бүтээлчид цалин хөлс, урамшууллаа бүрэн авч чадахгүй нөхцөл байдал үүсээд байна. Төсвийн энэхүү таналт нь байгууллагын хэвийн үйл ажиллагаанд сөргөөр нөлөөлж, уран бүтээлчдийн хөдөлмөрийн үнэлэмж буурах, ажлын байрны тогтвортой байдал алдагдах эрсдэлийг бий болгожээ.
Иймд уран бүтээлчид аймгийн Үйлдвэрчний эвлэлийн холбоонд албан ёсоор хандан, эрх ашиг, нийгмийн баталгаагаа хамгаалуулах хүсэлт гаргасан бөгөөд уг асуудлыг холбогдох шат шатны байгууллагуудад уламжлаад байна.
Тус театр нь 2025 оны долоодугаар сард Төсвийн хэмнэлтийн тухай хуулийн хүрээнд бүтцийн 9 хувийн таналт хийж, тодорхой тооны ажлын байрыг цомхотгож байсан. Харин 2026 онд батлагдан ирсэн төсвийн хүрээнд үйл ажиллагаагаа хэвийн явуулахад дахин 28–30 орчим ажилтан ажлын байраа алдах бодит эрсдэл үүсээд байгааг холбогдох албаныхан онцолж байна.
Уран бүтээлчдийн зүгээс энэхүү нөхцөл байдал нь зөвхөн нэг байгууллагын асуудал бус, орон нутгийн соёл урлагийн салбарын хөгжил, иргэдийн соёлын хүртээмжид сөргөөр нөлөөлөх ноцтой асуудал хэмээн үзэж буйгаа илэрхийлжээ. Тиймээс төсвийн таналтыг дахин нягталж, соёл урлагийн байгууллагуудын үйл ажиллагааг доголдуулахгүйгээр шийдвэрлэх шаардлагатай байгааг онцолж байна.
Асуудлыг холбогдох төрийн байгууллагуудад уламжилсан бөгөөд нааштай шийдэл гарна гэсэн итгэл найдлага тээж, уран бүтээлчид одоогоор ажлаа хэвийн үргэлжлүүлэн хийж байгаа аж.
Сэтгэгдэл үлдээх