Увс нутагтаа болон Монгол орныхоо өнцөг булан бүрд аж төрөн суугаа уугуул, суугуул нийт иргэддээ Аймгийн иргэдийн Төлөөлөгчдийн Хурлын нэрийн өмнөөс болон хувиасаа угтан золгож буй 2025 оны баярын мэндчилгээг өргөн дэвшүүлье.
Иргэд та бүхний итгэл хүлээлгэн сонгосон Аймгийн иргэдийн Төлөөлөгчдийн Хурал 35 төлөөлөгчтэйгөөр ажиллаж, 2 удаагийн хуралдааныг хийж 56 заалт бүхий 20 тогтоол гаргалаа.
Ээлжит 2 дугаар хуралдаанаараа Монгол улсад хэрэгжиж буй урт, дунд, богино хугацааны бодлогын баримт бичгүүдэд тулгуурлан аймаг, орон нутгийнхаа онцлогт тохируулан аймгийн ирэх 4 жилийн Засаг даргын үйл ажиллагааны хөтөлбөр, Аймгийн 2025 оны хөгжлийн төлөвлөгөө, аймгийн 2025 оны төсөв, газар зохион байгуулалтын төлөвлөгөө зэрэг бодлогын баримт бичгүүдийг баталлаа.
Аймгийн хэмжээнд 2024 оны урьдчилсан дүнгээр 19 сумын 22.9 мянган өрхөд 84.8 мянган хүн ам оршин сууж байна.
Энэ дашрамд татвар төлөх үүргээ биелүүлэн, бүхий л салбарт ажиллаж, нэмэгдэл өртгийг бий болгож буй хувийн хэвшлийн аж ахуйн нэгж байгууллагууд, нийт иргэддээ талархаж байгаагаа илэрхийлье.
Энэ онд явагдсан нутгийн өөрөө удирдах байгууллагыг сонгох 9 дэх удаагийн сонгуулиар түмэн олныхоо итгэлийг хүлээн сонгогдсон ИТХ-ын төлөөлөгчид бид Засаг дарга түүний тамгын газар, төрийн байгууллагуудтайгаа хамтран аймгийн нийгэм эдийн засгийн тулгамдсан асуудлыг ард иргэдийнхээ идэвх, оролцоонд тулгуурлан шийдвэрлэж, төрийн үйлчилгээг ил тод шуурхай хүргэж, гаргасан шийдвэрийнхээ хэрэгжилтэд тавих хяналтаа сайжруулж, иргэдээ эрүүл аюулгүй орчинд ая тухтай амьдрах нөхцөлийг хангахаар чармайн ажиллах болно.
Айлчлан ирж буй 2025 онд Увсчууд бид аймгийнхаа түүхт 100 жилийн ойн баярыг тэмдэглэнэ. Түүхт ойн жил бүтээн байгуулалт өрнөсөн, аймаг орон нутгийн хөгжилд амжилт ололтоор дүүрэн сайхан он жил байхыг билэгшээж байна.
Бид эв эеийг эрхэмлэж, зөв зүйлд тэмүүлж, хууль, журмыг чанд сахих нь ирээдүйн сайн сайханд хүрэх гол хөшүүрэг юм гэдгийг баярын энэ өдөр тэмдэглэн хэлэхийг хүсэж байна.
Айлчлан ирж буй 2025 он айл бүрд өнгө гэрэл, хүн бүхэнд баяр жаргал авч ирэх болтугай.
Та бүхэндээ шинэ оны мэнд хүргэе.
УВС АЙМГИЙН ИТХ-ЫН ДАРГА П.БАТТУЛГА
Сэтгэгдэл үлдээх