Увсын ард түмэн Улсын баярын энд дүйцэх “Увс-100” жилийн ойгоо тэмдэглэж хотол олныг баясган цэнгүүлж, холын зочдыг даллан дуудсан, харах нүд, санах оюунаас хэзээ ч үл мартагдах түүхэн өдрүүдийг хамтдаа үдэж чадлаа
Түүх өгүүлэн сүндэрлэх Хархираа, Түргэний уулс, Улаангом хотын өнгө төрхийг тольдон харуулдаж эрүүл энх, элэг бүтэн, амар тайван амьдралын чигийг заан билэгдэж Улаан уулыг мөнхийн манаанд зогсоосон гэлтэй. Увс аймаг үүсгэн байгуулагдсан тэр л цагаас байшин барилга, сургууль, цэцэрлэг гээд хөгжлийн хэрэгцээ нэмэгдсээр өнөөгийн Улаангом хот сүндэрлэн босож өдрөөс өдөрт ӨНГӨ НЭМЭН тэлсээр байна.
Аймаг, орон нутгийнхаа хөгжилд гар бие оролцож бүтээн байгуулалтыг өрнүүлэн байгаа Барилгачдаараа бид бахархахгүй байхын аргагүй… Он цаг улиран өнгөрөвч тэдний барьж байгуулсан сургууль, цэцэрлэг, орон сууц гээд бүгд үнэ цэнээ илтгэн аз жаргалыг түгээсээр.
Удахгүй Улаангом хотын төв хэсэгт “Ariya Tower” өнгө нэмэн босож байгаад сэтгэл ихэд татагдаж энэ зүг рүү сэтгүүлчийн нүд, үзэг хоёр чиглэсэн юм. “Ariya Tower” төслийн ахлагч “МОНКОМОС” ХХК-ний гүйцэтгэх захирал Я.БУЛГАНТАЙ ийнхүү хуучилж амжлаа.
Сэтгүүлч: Юуны өмнө танд болоод танай баг хамт олонд аймаг, орон нутгийнхаа хөгжил цэцэглэлтэд өнгө нэмж олон сайхан барилга байгууламжийг босгож байдагт мөн “ARIYA TOWER” шинэлэг, өвөрмөц загвар шийдэл бүхий төслийг эхлүүлж удахгүй ажил хэрэг болох гэж байгаад амжилт хүсье.
“Ariya Tower” төслийн онцлог, давуу тал бусдаас ялгарах зүйл нь юу байх вэ?
Я.Булган: Ер нь газар барилга хоёр хосолж байж үнэ цэнтэй байдаг. Энэ гоё энергитэй сайхан газар дээр бид гоё барилга барихыг л зорьсон. Тэр ч утгаараа гэр бүлээрээ, багаараа сэтгэл зүрхээ зориулан ажиллаж байна. Байгууламжийн деталь бүр дээр өөрийн өнцгөөс харж бусдад таалагдах, таатай байх талаас нь маш их анхаарч, нарийн тооцож бүтээж байгаа. Тансаг зэрэглэлийн орон сууц тул бүхий л зүйл чанартай, найдвартай, эрүүл ахуйн таатай нөхцөл байдлыг хангасан байхаас гадна тухайн оршин суугчийн сэтгэл ханамжид зуун хувь нийцэх тийм л мэдрэмжийг өгөхийг хүсэж байна. Ашиг хувь олохоосоо илүү энэ сайхан газар дээр хамгийн сайхан барилга барьж аз жаргалтай, таатай тухтай байх орчныг бүрдүүлэхийг зорьж байна. Тансаг зэрэглэлийн байр ямар байх ёстой тэр л стандартыг илүү баримталсан.
Хийцлэл, ганжуулсан шил нумлах гээд асуудал их юм билээ. Хүн бүрээс маш их ур ухаан, нарийн мэдрэмж шаардаж байна. Би хуульч, эдийн засагч хүн. Гэхдээ энэ барилгын явцад өөрийн мэдрэмж, харах өнцөг, барилгын шийдэл загварыг судалж үзэж байна. Барилгачин хүн сэтгэлээсээ ажлаа хийдэг. Хэрэв өөрөө би энэ байшинд амьдрах бол энэ яах ёстой байсан бэ, ямар байвал зохимжтой байна гээд өөриймсөг сэтгэлээр хандаж хийх хэрэгтэй гэж боддог.
Барилгын явцын үед байнга орж үздэг. Зургийн дагуу барьсан зарим хэсгийг ажиглахад ямар ч зохицолгүй байх тохиолдол ч байна. Яавал аятайхан байгааг өөрсдөө өдөр бүр орж харж, аль болох маш зөв шийдлийг эрэлхийлж, ярилцаж, бүтээж байгаа болохоор сайхан байгууламж удахгүй сүндэрлэнэ гэдэгт итгэлтэй байна.
Сэтгүүлч: “Ariya Tower“ гэдэг нэр ямар утга учиртай вэ?
Я.Булган: Надад нэг хүн энэ сайхан газрыг чи л амь оруулж гоё зүйл барьж чадна гэж урам зориг, эрч хүч хайрласан тэр цагаас л би энэ сайхан газар дээр сайхан барилга барих юмсан л гэж бодох болсон. “Чи л чадна” гэж урам өгсөн тэр хүнд би талархдаг.
“ARIYA” гэсэн үгийг хэлэхэд зөөлөн сонстох, сүнслэг эерэг нэр гэж би боддог. Хүнд 5 буян байдаг. Насны буян, ханийн буян, үрийн буян, эдийн буян, эрүүл мэнд оршихуйн буян гэж. Энэ 5 буяныг багтаасан нэр учир АРЬЯА буюу “ARIYA” TOWER нэрийг өгсөн. Энэ байранд орсон айл бүрд энэ таван буян шингэсэн байгаасай, аз жаргалтай, эрүүл энх өнөр өтгөн амьдран суугаасай гэсэн утгатай юм.
“ARIYA TOWER” сүндэрлэн босох газар минь Улаангом хотын хувьд хамгийн үнэ цэнтэй, эрхэм, зөв энергитэй газар гэдэг утгаар нь гоё нэр өгөхийг зорьсон. Ийм тансаг гоё газарт энэ хэмжээний барилга сүндэрлэх ёстой гэж бодсон. Тэр хэмжээгээр ч үнэ яригдах нь зүйн хэрэг. Өөрөөр хэлбэл аз жаргалаа бүтээсэн, амьдралаа төвхнүүлчихсэн, хэлэх үгтэй, хийсэн ажилтай, бүтээсэн зүйлтэй хүмүүсийн жаргаж суух тансаг Ордон байх болно гэж бодож байгаа.
Сэтгүүлч: “Ariya Tower“ төсөлд хамгийн их үүрэг гүйцэтгэж байгаа хүнийг хэн гэж та нэрлэх вэ?
Я.Булган: Намайг байнга дэмжиж, сонсож байдаг миний хань. Ер нь хүнийг маш сайн сонсож байхад хүн цэцэглэж байдаг гэж би боддог. Би өдөр болгон Тэсхүүдээ дурладаг. Ямар их хүлээцтэй, хүндлэлтэй байдгийг одоо хүртэл би биширдэг. Би их азтай хүн шүү. Миний хань бүх зүйлд надаас илүү нарийн хандаж холыг бодож ирээдүйг хардаг. Их сайхан харилцаатай. Хүн бүрд л “төрсөн” ахын мэдрэмжийг өгдөг. Хүн бүртэй ахын дүү юу байна, яаж байна гээл түрүүлээд л асууна даа. Энэ төсөлд бараг л миний хэлсэн санаа, шийдэл, асуудлыг хамгийн түрүүн шийдэж дэмжиж “зөв” болгож улам сайжруулдаг.
За мөн миний том хүү байна. “Хархираа” цогцолборыг бүтээн босгоход гар бие оролцсон одоо “ARIYA TOWER” төслийн гол хөдөлгөгч хүч болж байна. Олон мэргэжлийн шилдэг хүмүүсээр бүрдүүлсэн төслийн баг байна. Бүгд л маш том үүрэг хариуцлагыг нуруундаа үүрч ажиллаж байна даа.
Сэтгүүлч: Танай гэр бүлийн хувьд “ARIYA TOWER” төсөл амжилттай хэрэгжих нь ойрын хугацааны том зорилго. Басхүү бие биенээ улам сайн таньж ойлгох цаг хугацаа гэж хэлж болох уу?
Я.Булган: Яг тийм.Урьд нь аав нь өглөө эрт босоод явахад хоёр хүү унтаж байдаг бол одоо аав унтаж байхад хоёр хүү минь аль эрт босоод ажилдаа гарчихсан байдаг болж. Бараг л шөнө унтаж чадахгүй ажилдаа санааширч сэрж байна. Бүх зүйлд сэтгэлээ шингээж бүтээхийг зорьж, тэр их ажлын амтанд өөрийн эрхгүй орчихсон яваад баярлаж сууна. Шууд нүүрэн дээр нь сайн байна гээд магтаад байхгүй ч сэтгэл дотроо бол ажил хөдөлмөрийн амтыг мэдэрч байгаа хөвгүүддээ, эцэг хүний ноён нуруу, холч ухаанаар хөвгүүдээ зөв хүмүүжүүлж чадсан ханиараа маш их бахархаж байна. Манай гэр бүлийнхэн бүгд л энэ төсөл дээр гар бие оролцож байна.
Сэтгүүлч: Удахгүй Улаангом хотын төв хэсэгт сүндэрлэн босох “ARIYA TOWER” төслөө амжилтай хэрэгжүүлэн, аймаг орон нутагтаа олон бүтээн байгуулалт хийхийг танай хамт олноос хүсье. Мөн сэтгэл зүрхээ шингээн ажиллаж байгаа танай төслийн багийн хамт олонд ажлын өндөр амжилтыг хүсье.
Сэтгэгдэл үлдээх