27 ЖИЛИЙН ДАРАА МОНГОЛ УЛСЫН 3 ДАХЬ ТҮРҮҮГ ЭХ ОРОНДОО АВЧИРСАН УВС НУТГИЙН ХҮҮ БАТХУЯГИЙН МӨНХ-ЭРДЭНЭ НУТАГТАА ИРЛЭЭ.
2018 онд өсвөр үеийн Улсын аваргын дэвжээнд түрүүлж, анхны багш БУЯНТ болон Увс нутгийнхаа багш нарын зөвлөснөөр аав, ээжийн хамт ТӨГС дэмжээний багшид шавилан очиж байсан жижигхэн биетэй ч том мөрөөдөл тээсэн хүү бол Батхуягийн МӨНХ-ЭРДЭНЭ байлаа.
Тэр хүү өнөөдөр идэрхэн насныхаа торгон ирэн дээр ирж, Монголын бөх сонирхогчдын итгэл, хүндлэлийг хүлээсэн, ирээдүйн их амжилтын эзэн болжээ. Дээлнийх нь захыг мушгин ерөөх хүн өдөр ирэх тусам олширсоор байна.
Төлөв даруухан, аав ээжийн эрх хүү Б.Мөнх-Эрдэнэ чөлөөт бөхийн 57 кг-ийн жинд 3 жил дараалан Улсын аварга болж, 2 жил дараалан Ази тивийн аваргаас медаль хүртсэн бахдам амжилтын эзэн болсон юм.
Тэрээр энэ оны эхэнд “Бага дэлхийн аварга” хэмээн нэрлэгддэг Иван Ярыгиний нэрэмжит олон улсын тэмцээнд хүчтэй өрсөлдөгчдөө илүүрхэн ялж, дэлхийн аваргыг хол тасархай давамгайлан финалд шалгарснаар 1999 оноос хойш Монгол Улсын тамирчдын хүртсэн 3 дахь аваргын цолыг эх орондоо авчирсан түүхэн амжилтыг бүтээлээ.
Өдөр бүр мөрөөдлөө хөглөж, зорилгоо улам ирлэн, хөдөлмөр хичээл зүтгэлээрээ ирээдүйн их амжилтуудын оргилд хүрэх болтугай.
Эх орон, элгэн садан, Увс нутгийнхан тань үргэлж уухайлан дэмжих болно.
Сэтгэгдэл үлдээх