Улаангом политехник коллежийн оёдлын мэргэжлийн багш, Монгол Улсын Зөвлөх багш Х.Бямбасүрэн Монгол Улсын Ерөнхийлөгчийн зарлигаар “АЛТАН ГАДАС” одонгоор шагнагдлаа. Боловсролын салбарт 35 жил, үүнээс мэргэжлийн боловсролын салбарт 27 жилийн амьдралаа зориулж, Монгол Улсын мэргэжилтэй ажилтан бэлтгэх үйлсэд үнэтэй хувь нэмэр оруулж яваа нэгэн эрхэм багшийг бид энэ удаа онцолж байна. Тэр бол Монгол Улсын Зөвлөх багш бөгөөд оёдлын урлалыг дэлхийн тавцанд сурталчилж яваа чадварлаг зохион бүтээгч юм.
Ажлын гараа ба Тууштай зүтгэл
Түүний багшлах ажлын гараа Увс аймгийн Давст сумаас эхэлж байсан бол, 1999 оноос хойш өнөөдрийг хүртэл Урлаг Технологийн Коллежид (УПК) оёдлын мэргэжлийн багшаар тасралтгүй ажиллаж байна. Сумын сургуулийн бага ангийн багшаас эхлээд улсын хэмжээний зөвлөх багш хүртэлх энэ замнал нь түүний салбартаа хэрхэн үнэнч зүтгэсний тод илрэл юм.
Олон улсын тавцанд Монгол ур ухааныг тамгалав
Зөвлөх багш маань зөвхөн танхимд заагаад зогсохгүй, өөрийн ур чадвараараа олон улсад хүлээн зөвшөөрөгдсөн уран бүтээлч юм.
-
ОХУ-ын Абакан хот: Хакассын их сургуулиас зохион байгуулдаг “Арт-Идеа” загварын шоу уралдаанд 2008 онд “Этностиль” номинацид ГРАНПРИ хүртэж байв.
-
Сүүлийн үеийн амжилт: Түүний бүтээлч сэтгэлгээ өнөөдөр ч залуучуудтай эн зэрэгцэн гялалзаж, 2024 болон 2025 онуудад “Арт-Объект” төрөлд дараалан тэргүүн байр эзэлж, Монгол багшийн ур чадвар хэзээ ч хуучрашгүй гэдгийг батлан харууллаа.
“Багшийн алдар шавьдаа…”
Багш хүний хамгийн том шагнал бол амжилттай яваа шавь нар байдаг. Түүний бэлтгэсэн шавь нар болох Дэлгэрцэцэг (2016 он, улсад 5-р байр), О.Нямсүрэн (2018 он, улсад 2-р байр) нар нь Монголын оёдлын салбарын шилдэг залуу боловсон хүчнүүд болон төлөвшжээ. Мөн тэрээр залуу багш нарын “чиглүүлэгч” байж, түүний удирдлага дор бэлтгэгдсэн багш нар заах арга зүйн уралдаанд удаа дараа тэргүүн байр эзэлсэн нь түүнийг “Багшийн багш” гэдгийг батална.
“Мэргэжилтэй ажилтан бол улс орны хөгжлийн тулгуур. Тэрхүү тулгуурыг бат бөх цутгахад 35 жилийн хөдөлмөрөө зориулна гэдэг бол эх оронч үзлийн хамгийн том илрэл юм.”
Өнөөдөр түүний олон зуун шавь нар Монгол улсын өнцөг булан бүрт мэргэжлээрээ амжилттай ажиллаж, үндэсний үйлдвэрлэлийг нуруундаа үүрч явна. Арвин туршлага, нарийн мэдрэмж, тууштай хөдөлмөрөөрөө салбарынхаа түүхийг бичилцэж буй Зөвлөх багшдаа амжилт хүсье.
Сэтгэгдэл үлдээх