Увс аймгийн түүхт 100 жилийн ойн хүрээнд Увсчууд сайтын хамт олноос хөдөлмөрч малчдын дундаас төрөн гарсан Улсын сайн малчидыг цувралаар танилцуулж байна.
Далай ханы хошуу
одоогийн Түргэн сум нутагт төрсөн Түвдэнгийн АВИРМЭД нь Ардын засгийн эхний жилүүдэд мал сүргийн тоо толгойг өсгөх, ашиг шимийг бүрэн ашиглах, малдаа хашаа хороо барих, худаг ус гаргах, хадлан тэжээл бэлтгэх талаархи нам, засгийн бодлого шийдвэрийг хэрэгжүүлэхэд хүчин зүтгэл гаргасан тул 1941 онд болсон Улсын сайн малчдын АНХДУГААР зөвлөгөөнд шалгаран оролцож, «Алтан гадас» одонгоор шагнуулж, «Улсын хамгийн сайн малчин» цол хүртжээ.
Түүний хувьд 1911 оны үндэсний эрх чөлөөний хувьсгалын явцад Баруун Монголд байсан гаминг хөөх тэмцэлд оролцож Далай ханы хошууны бууч Шөтэйн тэргүүлсэн ардуудтай хамтран Улаанбайшинтад байсан хятадын пүүс, түүнийг хамгаалсан цэргүүдийг бут цохиж, өрийн дансыг шатааж байсан эх орныхоо тусгаар тогтнолын төлөөх тэмцэлд оролцож явсан малчин ардын нэг юм.
Мөн «Улсын хамгийн сайн малчин» Т.Авирмэд нь 1943 оны эхээр Зөвлөлтийн улаан армид бэлэг хүргэх Ю.ЦЭДЭНБАЛ даргын толгойлсон төлөөлөгчдийн бүрэлдэхүүнд орж зөвлөлтийн алдарт жанжин Г.К.Жуковын командалсан Баруун фронтод очиж Монголын ард түмний бэлэг сэлтийг гардуулахад оролцжээ. Түүнийг 3ХУ-ын дээд зөвлөлөөс «Гвардийн улаан туг»-ийн одонгоор шагнасан байна.
Сэтгэгдэл үлдээх