Суурь тавигдсан эхний 10 жил буюу 1940-1950 он
Тариалан сумын нутагт 1925 онд “Алтан тээл” сум байгуулагдсанаар ард иргэддээ бичиг үсэг сургах ажлыг эрчимжүүлж, 1930-аад онд дугуйлан, бүлгэмүүд байгуулан хавар, зун дулааны улиралд түр хугацаагаар улирлын чанартайгаар богино хугацаанд хичээллүүлдэг болсон байна. Энэ нь тухайн үедээ тус суманд анхны бага сургууль байгуулагдах нөхцөл бүрджээ. 1940 оны 08 дугаар сарын сүүлчээр Тариалан сумын нутаг “Тээлийн боом” гэдэг газар анхны ардын бага сургууль байгуулагдан 52 сурагч, 3 багш, 2 ажилчин, 4 эсгий гэртэйгээр үйл ажиллагаагаа эхэлсэн байна. Анхны захирлаар Бадамдоржийн ТҮДЭВДОРЖ, багшаар Үлэмжийн ЖООШ, Гэзэгтийн БУЛГАН, нярав БААТАР, галчаар БУУЛАХ, БИЧИН нар ажиллаж байжээ.
1943 оны 8-р сард бага сургууль одоогийн сумын төв буюу Хархираан боомд шилжин суурьшсанаар цаашдын хөгжил, дэвшлийн үүд хаалга нээгдсэн байна.Тухайн үед сумын АДХ-ын Гүйцэтгэх Захиргааны даргаар Т.Чулуун ажиллаж байв. Сургууль анх байгуулагдаж байх үетэй харьцуулахад материаллаг бааз, боловсон хүчин төсөв санхүүгийн хувьд нэлээн бэхжин 4 багш, 6 ажилчдын орон тоотой болж хичээлийн дотуур байр, багш нарын контор, гал тогоо зэрэг 10 шахам гэртэйгээр үйл ажиллагаа явуулан хүүхдийн тоо ч нэмэгдсэн байна. Энэ үед улсын хэмжээнд бүх сумдад бага сургуультай болсон учир төр засгаас ч нэлээд анхаарч кирилл бичгийн цагаан толгойн номыг шинээр хэвлэн гаргасан байна.
1944 оноос эхлэн сургуульд хичээлийн байр, гал тогоо барьсан байна. 1945 оны үеэс сумын бага сургуулийн 3,4-р ангийн хүүхдүүд пионерийн гишүүнд элсэж, улаан бүч зүүдэг байв. 1946-1947 оны хичээлийн жилээс дээд байгууллагын шийдвэрээр зуны сургалтыг бүрмөсөн зогсоож бүх сургуулийн хичээлийг 9-р сарын 1-ээс эхэлж 5-р сарын 20-нд дуусгаж байх тухай тогтоол гарчээ.
Сургалтын таатай орчин бүрдсэн 2 дахь арван буюу 1950-1960 он
1950 он бол сургуулийн үйл амьдралд чухал ач холбогдол бүхий тэмдэглэлт он жил байлаа. Учир нь энэ онд 4 анги бүхий анхны шинэ хичээлийн байр ашиглалтанд орсноор хичээл, сургалт хүмүүжлийн ажил явуулах таатай орчин бүрдэн сургуулийн материаллаг бааз улам бэхжсэн юм.
1954-1955 оны хичээлийн жилээс сургуулийн насны хүүхдийг сургуульд бүрэн элсүүлэн сургах тухай шийдвэр гаргасан байна. 1950-иад онд сургуулийн захирлаар Г.Бизъяа, Ш.Хянгуу, О.Бадарч, Б.Махминь, Ж.Дорж, Арслан, Н.Жимбэ, Г.Бүүвэй нар ажиллаж байсан.
Сэтгэгдэл үлдээх