Монгол Улсын Ерөнхийлөгчийн зарлигаар Увс аймгийн Зүүнхангай сумын харьяат, МУ- ын гавьяат багш, МУ- ын Ардын багш, техникийн шинжлэх ухааны доктор /Sc.D/, профессор, академич Чилхаажавын Авдай багш 2021 онд Монгол улсын “Хөдөлмөрийн баатар” цол хүртэж байв.
Тэрээр Увс аймгийнхаа ард иргэдийг төлөөлөн УИХ-д сонгогдож байсан эрхэм юм.
Ардын багш, академич #ЧИЛХААЖАВЫН_АВДАЙ Увс аймгийн Зүүнхангай сумын нутаг Яргайт гэдэг газар 1943 онд төрсөн.
Зүүнхангай, Цагаанхайрхан, Баруунтуруун сумдад суралцан 10-р анга дүүргэсэн. МУИС-д суралцаж Хөнгөн үйлдвэрийн механикч инженерийн мэргэжил эзэмшсэн. 1966 оноос эхлэн МУИС, ПДС-д багш, проректороор, ПДС, ТИС-д ректороор, 2000 оноос УИХ-д гишүүнээр 2 удаа сонгогдон ажилласан.
2008 оноос Хүрээ Дээд сургуульд орлогч захирал, ШУТИС-д зөвлөх багшаар ажиллаж байна. Ч.Авдай нь Чацаргана хураах ажиллагааг механикжуулах үйлдвэрийн аргаар боловсруулах сэдвээр 1975 онд техникийн шинжлэх ухааны дэд доктор, 1990 онд докторын зэрэг хамгаалж профессор цол хүртсэн.
1991 онд Монгол улсын Шинжлэх ухааны академийн 1994 онд ОУ-ын инженерийн академийн, 1998 онд ОУ-Дээд боловсролын жинхэнэ гишүүнээр сонгогдсон. 1988 онд техникийн ухаанаар дотооддоо эрдмийн зэрэг хамгаалах зөвлөл байгуулан, одоо тэр зөвлөлөө удирдаж байгаа бөгөөд 40-өөд хүний эрдмийн зэрэг хамгаалах ажлыг удирджээ. Ч.Авдай нь Олон улсын шинжлэх ухааны байгууллагын гишүүн, хүндэт доктор цол шагнагдсан нэр хүндтэй эрдэмтэн юм. Чацаргана боловсруулах 16 жижиг үйлдвэр байгуулсан олон мянган залуусыг техникийн дээд мэдлэг эзэмшүүлсэн, УИХ-ын гишүүн байх үедээ тойргийнхоо олон суманд бүтээн байгуулалтын их ажил хийсэн зэрэг бүтээлч үйл ажиллагааг нь үнэлж 1997 онд Гавьяат багш, 2007 онд Ардын багш цол, шилдэг зохион бүтээгч, олон салбарын тэргүүний ажилтан болон одон медалиар удаа дараалан шагнагджээ.
Ч.Авдай нь Зуүнхангай сумын Улаанбаатар дахь нутгийн зөвлөлийн ажилд анх байгуулагдсанаас хойш тогтмол оролцож, хөрөнгө мөнгө хандивлаж яваа идэвхтэй гишүүн юм. Нутгийн зөвлөлийн хуралд бараг эхэнд нь, зарласан хугацаанд л ирдэг. Олон газар их ажилтай явдаг ч хожимддоггүй. Үүгээрээ нутгийнхаа залуучуудад үлгэрлэдэг юм байна.
Авдай нь зөвхөн онолын эрдэмтэн гэхээргүй, эрдэм судлал нь шууд үйлдвэрлэл болж байдаг. Хамгийн сүүлчийн жишээ хэлэхэд бий болгосон технологи, зохион бүтээсэн тоног төхөөрөмжөөр үйлдвэрлэсэн “Чацарганы цэвэр тос” бүтээл нь дэлхийн 36 орны 651 бүтээл тавигдсан Сөүлийн үзэсгэлэнгээс 2010 онд алтан медаль хүртсэн, ШУТИС-ийн хагас зуун жилийн ойгоор “Хүндэт доктор” цол өргөмжилсөн зэрэг олон зүйлийг сонордуулж болох байна.
Сэтгэгдэл үлдээх